App ထဲကနေ Movie Request လုပ်ထားတဲ့ကားတွေထဲက တစ်ကားဖြစ်တဲ့ Priest လေးကိုဘာသာပြန်တင်ဆက်ပေးလိုက်ပါတယ် ၂၀၁၁ ခုနှစ်ထွက် ဒီသွေးစုပ်ဖုတ်ကောင် ဇာတ်ကားမှာဆိုရင်တော့ ... အဓိကဇာတ်ဆောင်အဖြစ် ဝန်ဒါရဲ့ Vision နေရာမှာသရုပ်ဆောင်တဲ့ ‘Paul Bettany’ The Boys ထဲက အရိုင်းအစိုင်းတုံးကြီး Billy Butcher နေရာမှာ ပါဝင်တဲ့ ‘Karl Urban’ ပါရီမြို့ကအမ်မလီအဖြစ် သရုပ်ဆောင်တဲ့ မင်းသမီးချောလေး ‘Lily Collins’ နဲ့ နီကီတာမင်းသမီး ‘Maggie Q’ တို့ ငယ်နုစဉ်က အချိန်အခါတွေကို မြင်တွေ့ရမှာဖြစ်ပါတယ်။ ဇာတ်လမ်းကတော့ လူသားတွေနဲ့ သွေးစုပ်ဖုတ်ကောင်တွေက အတူယှဉ်တွဲနေထိုင်မရတဲ့ မျိုးနွယ်နှစ်ခု ဖြစ်ပြီး တစ်ဖွဲ့ကိုတစ်ဖွဲ့ အမြဲစစ်ဖြစ်နေရာမှ လူသားတွေဘက်က ဘုရားကျောင်းရဲ့ အကာအကွယ်နဲ့ တံတိုင်းကြီးနောက်မှာ မြို့တွေတည်ပြီးနေလိုက်တဲ့အပြင် ဘုရားကျောင်းကပဲ လေ့ကျင့်ပေးထားတဲ့ ဘုန်းတော်ကြီးတွေနဲ့ သွေးစုပ်ဖုတ်ကောင်တွေကို နှိမ်နင်းလိုက်နိုင်ပါတော့တယ်။ ဘုရားပြီး ငြမ်းဖျက်တယ်ဆိုတဲ့အတိုင်း သွေးစုပ်ဖုတ်ကောင်တွေကို သီးသန့်နေရာတွေ သတ်မှတ်ပြီး ထိန်းသိမ်းလိုက်နိုင်တဲ့အခါ ဘုရားကျောင်းက ဘုန်းတော်ကြီးတွေအဖွဲ့ကို ပယ်ဖျက်ပြီး လူ့အဖွဲ့အစည်းထဲကို ဝင် ပြည်သူနဲ့အတူ အလုပ်တွေလုပ်ခိုင်းပါတော့တယ်။ ဒီလိုနဲ့ တစ်ရက် ရှေ့တန်းနေရာတစ်ခုက မိသားစုတစ်စုကို သွေးစုပ်ဖုတ်ကောင်တစ်သိုက်က ဝင်သတ်ပြီး သမီးလုပ်သူကို ဖမ်းဆီးသွားပါတော့တယ်။ သတ်ခံလိုက်ရတဲ့ မိသားစုမှ ဖခင်လုပ်သူက သွေးစုပ်ဖုတ်ကောင် သတ်တဲ့နေရာမှာ အတော်ဆုံးဘုန်းတော်ကြီးရဲ့ ညီအစ်ကိုဖြစ်နေတဲ့အတွက် ဖမ်းခံလိုက်ရသူက သူ့တူမလေး ဖြစ်နေတော့ ဘုန်းတော်ကြီးက တူမလေးကို လိုက်လံကယ်တင်တဲ့ဇာတ်လမ်းပဲဖြစ်ပါတယ်။ (အညွှန်းရေးသားသူနဲ့ ဘာသာပြန်သူကတော့ Leon K Zaw ဖြစ်ပါတယ်။)