ဟာသကားစစ်စစ် ကောင်းကောင်းတစ်ကားကိုကြည့်ချင်တယ် ၊ ဟက်ဟက်ပက်ပက် ရယ်မောချင်တယ်ဆိုရင်တော့ ဒီဇာတ်ကားလေးကိုကြည့်ဖို့ ကျွန်တော်တိုက်တွန်းပါတယ်။ မင်းသမီး Anne Hathaway နဲ့ Rebel Wilson တို့နှစ်ယောက် အထူးပါဝင်သရုပ်ဆောင်ထားတဲ့ ဒီဇာတ်ကားက လူလိမ်ဇာတ်ကားပါ ။ ပြီးခဲ့တဲ့နှစ်က Ocean 8 မှာ Anne Hathaway ကိုလူလိမ်တစ်ယောက်အဖြစ်မြင်တွေ့ခဲ့ရပြီး ဒီနှစ်မှာလည်း လူလိမ်ဇာတ်ရုပ်နဲ့ ပြန်မြင်တွေ့ရတဲ့ဇာတ်လမ်းပါ။ ပြီးတော့ ဝဝတုတ်တုတ်နဲ့ ချစ်စရာကောင်းပြီး အမြဲပေါ့ပါးနေတဲ့ မင်းသမီး Rebel Wilson ကလည်း ကျွန်တော်တို့မြန်မာနိုင်ငံမှာ Pitch Perfect ဇာတ်ကားနဲ့ လူတော်တော်များများသိခဲ့ကြသလို သူမ သရုပ်ဆောင် ချက်တွေကလည်း ပေါ့ပေါ့ပါးပါးနဲ့ရယ်ရတယ်ဆိုတာ လူတိုင်းလိုလိုသိကြပါတယ်။ အခုနောက်ပိုင်းဟာသမယ်လုပ်တဲ့ ခပ်ဝဝအမျိုးသမီးဆိုရင် Melissa McCarthy ရယ် သူရယ်ကို ကျွန်တော်အကြိုက်ဆုံးပါပဲ။ သူတို့ဟာသတွေက အိုဗာမဖြစ်ဘဲ အမြဲပေါ့ပေါ့ပါးပါးနဲ့ရယ်ရလို့ပါ။ ဒီဇာတ်ကားမှာ Anne Hathaway က တစ်နေရာထဲမှာပဲ အခြေစိုက်လိမ်လည်နေတဲ့ အထက်တန်းစားမိန်းမ စတိုင်နဲ့တွေ့ရပြီး Rebel ကိုတော့ နယ်လှည့်ပြီး လိမ်နေတဲ့ ဖက်တီးမလေးအဖြစ်တွေ့ရမှာပါ။ Rebel က စားကျက်တွေ တစ်နေရာပြီးတစ်နေရာရှာရင်း လူလိမ်မနှစ်ယောက်တွေ့ကြပြီး ဘယ်သူက ဘယ်လိုတွေ တစ်ယောက်ပေါ်တစ်ယောက်ဖျံကျကြမလဲ…။ ဘယ်လိုတွေလိမ်ကြမလဲ…။ ဘယ်သူတွေ ဘယ်လို ခံကြရမလဲဆိုတာ ဟက်ဟက်ပက်ပက်ရယ် မောရလောက်တဲ့အထိ ကြည့်ရမယ့်ဇာတ်ကားတစ်ကားပါ။ စိတ်ညစ်ညူးနေတဲ့လူတို့ စိတ်ပင်ပန်းနေတဲ့လူတွေကအနေနဲ့ စိတ်အပန်းပြေချင်တယ်ဆိုရင် ဒီဇာတ်ကားလေးကိုကြည့်ဖို့ ကျွန်တော်တိုက်တွန်းပါတယ်။