90 ခုနှစ်ကျော်က Mystery ရုပ်ရှင်နဲ့မိတ်ဆက်ပေးချင်ပါတယ်။ ငါးဖမ်းတဲ့အလုပ်နဲ့ အသက်မွေးတဲ့ မြို့ငယ်လေးက ယုံတမ်းပုံပြင် အသက်၀င်လာတဲ့ ဇာတ်လမ်းဖြစ်ပါတယ်။ ဂျူရီ၊ ရေး၊ ဟယ်လန်နဲ့ ဘယ်ရီတို့လူငယ်လေးယောက်က နွေရာသီတစ်ခုမှာပါတီကနေ ကားမောင်းပြန်လာရင်း မတော်တဆ လူတစ်ယောက်ကို တိုက်မိပါတယ်။ အဲ့လူက မျက်နှာပုံစံပျက်သွားပြီး ဂျူရီတို့လေးယောက်က ကြောက်လန့်တုန်လှုပ်နေပြီး အမှုဖုံးဖို့အတွက် အဲ့လူကို ပင်လယ်ထဲပစ်ချလိုက်ပါတယ်။ သူတို့အချင်းချင်းလည်း ဒီကိစ္စကို သေတဲ့ထိ လျှို့ဝှက်ထားဖို့ သဘောတူခဲ့ပါတယ်။
တစ်နှစ်ကြာပြီးတော့ ဂျူရီကျောင်းပိတ်ရက် အိမ်ပြန်လာတုန်း သူ့ဆီကို ထူးဆန်းတဲ့စာတစ်စောင်ရောက်လာပါတယ်။ သူတို့အရင်နှစ်နွေမှာ လုပ်ခဲ့တာကို သိတယ်ဆိုတဲ့စာပါ။ ဒီစာကြောင့် သူတို့ ၄ယောက်ပြန်ဆုံကြပြီး သူတို့သတ်ခဲ့တဲ့သူက ဘယ်သူလဲ ဒီကိစ္စနောက်ကွယ်မှာ ဘယ်သူရှိနေတာလဲဆိုတာ စတင် စုံစမ်းပါတော့တယ်။ ဂျူရီတို့၄ယောက် လက်သည်ပဲမိမလား အန္တရာယ်နဲ့ကြုံမလားဆိုတာ စီးမျောခံစားနိုင်ပါပြီ။
ဒီဇာတ်ကားကိုအညွန်းနဲ့ဘာသာပြန်ပေးသူကတော့ Shune Lai KK ဖြစ်ပါတယ်
